Saga eftirlifenda II: Heljarþröm (Icelandic Edition)

Heljarþröm er önnur bókin í skáldsagnaþríleiknum Saga eftirlifenda. Saga ásanna sem lifðu af Ragnarök heldur nú áfram þar sem frá var horfið eftir hörkuspennandi endi fyrstu bókar. Við fylgjum eftir Baldri, Heði og veiðigyðjunni Skaði á ferðum sínum um harðneskjulega heimsmynd þar sem hætta er við hvert fótmál.

Í Heljarþröm tvinnast saman goðsagnir, mannkynssaga, heimspeki og samtíminn svo að úr verður þétt, frumleg og stórskemmtileg atburðarás: Váleg Eyðilönd árið 2310, Vakning Terrakotta-hersins í Kína, leitin að síðasta drúídanum í London, íslenskur tröllaættbálkur sem ræður ríkjum í borgríkinu Takram í borgarrústum Belgrads, Bardaginn um Gimli í Wisconsin, loftskipabardagar og margt fleira. Við mótun nýrrar heimsmyndar vakna upp hugleiðingar um fjölmenningu, trúarbrögð, örlög, orsök og afleiðingu og mátt sagnanna.

Emil Hjörvar Petersen er frumkvöðull á sviði furðusagna hér á landi. Hann leggur ríka áherslu á frásagnarlistina, en Saga eftirlifenda er sannfærandi og frumleg frásögn sem sver sig í ætt við borgarfantasíur, gufupönk og heimsendabókmenntir.

„Söguheimurinn er stórsniðugur og á Emil hrós skilið fyrir heimshönnunina [...] Líkt og forverinn nær hún hæstu hæðum á síðustu blaðsíðunum, sem eru hörkuspennandi.“
— Bjarni Ólafsson, Morgunblaðið

„Við mælum hiklaust með henni fyrir alla aðdáendur norrænna goðsagna, heimsenda- og/eða urban fantasía.“
— Starfsfólk Nexus, Nexus.is